BUBAGRANI MAIKHALAIO TOKHANI MOKOL – JAYATRI DEBBARMA | KOKBOROK STORY

0
292
Picture Courtesy - Hanung Debbarma

BUBAGRANI MAIKHALAIO TOKHA MOKOL

Haste kaisao khoroksa bubagra tongmani, bubagra belai borok kaham bini projarogno kaham khe naikollo chamung nwngmung mungsani biyal kwrwikhe tonio. bo haikheno buinobo khatung khaja khe tonio sakbo khatung khajawi tongo. Bini ishri khoroksa tongo. haikheno bubagra bini hao tongthok chathokkhe tonglaio chamung nwngmungni biyal kwrwikhe.
Salsa bubagra bini chathai nogo achugwi mai chawi tongo. dal kwbang chamung kothok kothok, bahai motom jib jib, hachal hachalo chamungni bahai motom pinjagwi thango nobar bai baksa. o jorao tokha kosom chamungni bahai manjagwi biyangnibo birwi phaiwi bubagrani chathainokni tailamo bawi ka ka pungwi tongphaio. bubagra tailamo naharwi nukjakkha tokha kosom keram thwimuru muru bini tailamo bajak. bubagra kok thaisa sayani swkango tokha khorok bomsawi bubagrano koiwi sao- Bubagrawi kha gwnang bubagrawi ang salba horbani mai machaya tesa hin k thwinani wngkha ano nini mairang tolao kwlaijak maino phano charigrasidi! o koimung khwnawi bubagra khairokjagwi mairang tolani mai thumwi tokhano charikha. mai chabaiwi tokha birwi thangkha.

Ulni salo bubagra haino hai maikhalai nahawi mai chana achukma jorao haino hai logio te masa tokha tubui phaio, bubagrano tokha sao- Bubagrawi maya gwnang kha gwnang bubagrawi miya nini mairang tolani mai machawi ani kha belai kwchangkha. haiphano kha kunasao mithikjak tongo tamo hinkhe angse ok pungphano ani logisongle ok pungya aboni bagwi tini logisongno tubui phaijakha. o kok khwnawi bubagra kicha wansugwi saka- Tokhasa nono to ang ani mairang tolani mai chari manu phiya nini logini bai nwng o mai kulokglak. Tokha kicha wansugwi sao- bubagra nini mairang tolani mai ang chawanw nwng mai chabaiwi nini hanta kicha tongmano ani logisongno charidi. Bubagra tokhani kokno gosikha. Tokha bai tokhajwk mai chawi birwi thangkha.

Ulni salobo haini hai bubagra maicha jorao tokha bai tokhajwk phaiwi bubagra mai chama gana sederwi phailaio, logio khoroktham bwsa. Tokhajwk khorok bomwi bubagrano kamsisi khe khorang henerwi sao- bubagrawi ang chawibo ansa machaya hinkhe chawi ok kwlaiya, bwsa khani kwsa, ang kwrwikhebo sarogno sabo si naino, sa kwrwikhe ani kha si phatiwanw! nini hantano chawi phano de buma bwsa kwthang matongno hinwi si phaijao bubagrawi! o kok khwnawi bubagra tongwi manjakliya khairogjagwi tokhajwkni kokno gosikha. phiyaba kicha wansugwi bubagra saphikha norog o hanta kicha bai ok de pungno ba? hai hinwi bini mairangni mai kicha sa naragwi tokhani bwsarogno charikha.

Haikhe mangno twrwk twrwk tokhani bwsarog erbaikha. Lekhawi kulpailiya tokhani bwsarog aswkkhe bangkha bubagra bini maikhalaini mai aphru kicha aphru kicha khe rwte rwte salsa bubagra si mai ok pungliya. Bubagra wansukkha omo hai khe mang tongkhe wnglak aboni bagwi kubuni salo tokharogni bagwi alaida khaiwi maimui songjakna wngthu hinwi bini maimui songnairogno sakha. phiyaba tokharog teibo bangrwrwgwi phaio. Salsa bubagra tei tokharog thansakheno mai chalai tongmani tokharogni bagwi mai kulokliya aphru tokharog sao bubagrano bini maikhalaini mai charina bagwi, bubagra charina gosiliya tamoni hinkhe bo tokharogno mai charikhe sak si okpungya wngsinai. omo hai kok banglai tongphru ukologo bachajak tokha masa sawi rio amswk maimui kothok kothok chawi bubagra tormani, bubagrani bahan si teibo thokna bla. o kok khwnawi joto tokha bubagrano chana bagwi sederwi phailaio aphru bubagra o amaa hinwi maikhalai yakarwi bachawi kharna nangkha!

Kothoma Swinai – Jayatri Debbarma