BURASA KAMICHANG – JAYATRI DEBBARMA | KOTHOMA (STORY)

0
190

BURASA KAMICHANG

_ Jayatri Debbarma

Sanja jom jom, mwnak salni pohorno monoksugwi paima hai wngkha! Hapar gwnangwi buphang waphang tei hamung siniya Khumbarrog jotono mwnago kwlwkjak. Nokhani talno nasinglai tongphano nokha kupulung chumwi kebengjak talni pohorno. Borokno karwi malmatarog phano bwswkangni lamano kaham k himwi manglak kha. Omohai jorao Rwngsati saichung lamao himjak. Bwswkangni lamano kahamkhe nukya phano bwswkang himwi thango kwbangma wansukmung twiwi, logio kirimung tei khakhamnungbo tongo.tamoni hinba o kirimasingsa jorao kirimasingsa lamatwi bo himwi thangna kwlaio. Burasa kamichang lamatwi salo phano c kamini borok kebo saichung laisuraknai kwrwi tamoni hinkhe aigini simino o jagao mwtai hamya tongo hinwi salaiwi phaijago tei yangtwi saichung lainairog kwbangkukno sak hamya wngwi eba sundruma chawi thwilaio, aboni bagwino aigini simino kamini borogrog o thaino burasa kamichang mung pharlaikha. salsni swkangono Rwngsatini mare burasa kamichangtwi dibor Khiring khiring saichung rwngnokkotorni nogo kiphilwi thangwi sarigono kotoksoroi thwikha. Lamao tamo wngwi thangka kebo sawi manya phiya kamini okra chakrarog wansuklaikha burasa kamichango mwtai hamya romjaklangkhwna hinwi.
Rwngsati puito khaiwi manjakya bini mare mwtai hamya romjagwi thwio hinwi, tamoni hinkhe Rwngsati by bini mare khoroknwino thansa porilaio tei jora kwtal by gwdaljak o jorao swkal mwtairog hinwi mwnak puito narwknai kwbang kwrwikha Rwngsati by bini marebo a bodolo khobjago. Rwngsati kamini borokrogni mwnak puitono swbaina muchungjak phano swbaiwi manya.phiya o sanja mwnak lamatwi saichung himphru Rwngsatini bwkhaobo kirima hapjak. Kubui kubuide mwtai hamya ba bini mareno butharkhwna? Mwtai hamya butharya hinkhe bini mare tamoni bagwi haikhe thwina kwlaikha chongwi manjakya Rwngsati, tamoni hinkhe salsni swkang bini mare thwimani phungono Rwngsati bini mare by malaio bo nugu bini mareni bwkhao mungsa khakhammung Kwrwi sakni langmano sakno sasuwi thangnani bwkha kwrwi, haikhe tamoni achomsa bini mare thwina kwlaikha? Kubui kubuida mwtai hamya tong?
Hamung siniya kokno wansukte wansukte Rwngsati bwswkang lama himo, te kicha lama himkheno burasa kamichang malainai. Yapri hilikjak bini, ukolok uphil uphilwi naharo kebo de phaino o lamatwi himnani kebono de logi mano hinwi. Yagobo hor kwrwi, phaiphru hor phwnangwi tubumale tubukha phiya hor thwiwi horsunta wngwi paikha. Rwtwk twrwk bwswkang himtwtwi bwkhano kwrak khaio je wngma wngsithun ani marebo mwtai hamya bai twlangjakkha ani marebai phano malaisithun.
Swrapsa himma yagulo Rwngsati burasa kamichango sogwio, mwnak kobolsajak tei buphang waphangrog bebakno nilar bachalaijak nobarbo serek serek yang ayang kobonsajak.bolongni yongsa kuksa phano kirijakma hai khorang… Achom pungo achom pungya. A jorao Rwngsati keboni khorang khwnaya sak sakni yapri sema khorang simi khwnao. Yapri helengsajak Rwngsatini bwkhao ayuk muyuk wngjak tabuk mungsaswk wngkhe khaprumwino thangnai chirigwi. Haikhe wansugwi himte himte achomsa bini ukologo te khoroksa himmani yapri khorang khwnajago Rwngsati. Phatsa uphilwi naiba kebo kwrwi, mwnak wngma bai mungsa nukya tobo yakni horsunta tisawi naio tei khorang kwlwitwtwi sabo hinwi swngo khorang yachaknai kwrwi siring siring, bolongni chengchuma simi chir chir pungo achom achom. Swrapsa himma yagulo burasa kamichang laitwtwi wngkha tei yakambaswk himkheno o kirimasingsa jaga lainai Bini Kamibo te bisi challiya kamichang laiwi kicha haduk himkheno malainai, kami ganao phairwrwk Rwngsatini yapri helengrwrwk, a joraono lama kinarni buphang tolao twmabo jani potopsa kwlaimani khorang wngwi riwi logi logino chirigwi Rwngsati khaprumlangkha. Haikhe chirigwino kamio sogwikha, bini chirikma khwnawi kamini borokrog kuthumlaijak bini nokhlao. Jotono wanalaijak bini kok khwnawi, bahai k aswk kirimasingsa mwnak jorao ayangtwi saichung laiwi phaika tei a manwi ba tamo wngkha tamo kwlaima khorang!
Rwngsati bini mareni horsni samungo thangwi nogo kiphilmani bini mareni kami bai bini kami aswk hachalya phano kwcharo burasa kamichang kebengjak. Sal tongsani nogo kiphilna hinwi thangphano kiphilwi manliya aboni bagwi saichung sanja jorao mwnak lamatwi ma phaikha. Bono haikhe saichung phaima nugui kamini borokrog baksa kirijakkha baksa wanajakha baksaba kha thangsajakkha. Nokni borokrogkhe teibo kirijakkha, bini mare hai bobude mungsaswk wngno, tamoni hinma ayangtwi saichung lainairog bebakno mungsaya mungsa wngo. Haikheno salnwi saltham laikha kami gwnangwi awai wngkha Rwngsatwi saichung burasa kamichang laiwi tabukbo kwthang tongkhu, kamini phatarobo o kokno twiwi awai wnglaijak. Baksa baksa kicha bwkha kotor rog hinkhe burasa kamichangno kirima hamrere wngbaikha. Ayangtwi saichung laina kwlaikhe Rwngsatini kok muitu khaiwi sak sakno methebwi laio.
Talsa laikha, burasa kamichangni kokno sanai bangliya, kamini borokrog sal rogo saichung kwnwi twrwk twrwk laisuna chenglaikha jotoni khaono kicha kicha kirima hamna naikha. Rwngsatibo a sanjao wngmarogno pokroro wngjakkha. Salsa bini mareni buma sak hamya wngo hinwi naina thangmani kiphilna dibor chok chok wngjak. Haino hai burasa kamichang lamatwi saichung phaina kwlaikha. Kiriya kiriya hinwi salai phano jotoni bwkhaono kichale kicha kirima tongkhu aboni bagwino kebo burasa kamichango thanglaiya samung nangyasak. Rwngsatibo tini laisuna nangna baino laisuo. Bwkhao kirimabai bini mareni kok muitu manjago, aphru tamo wngkha tabukbo kebo sawi manai kwrwi. Dibor chok chok borokno karwi yongsa kuksa phano khorang khwlainai kwrwi, borogno swrwngwi nobarbo siring siring buphang waphangbo thothong thatong bachalaijak, a jora Rwngsatini yapri simi yasa te yasa bai seklaijak tei bini hamani khorang bono karwi tumung bini gana borok tongkhe bo phano khwnakhamo. Haikhe thangte thangte burasa kamichangni lama kwcharo sogwkheno biyangnibo borok khorang hunu hunu khwnajago, omo hai jagao achomsa borok khorang khwnajagwi Rwngsati kichaswkle bwkha bachajakkha bo twrwk twrwk bwswkango thangwi Naiba chwla sikla makra makra khoroknwi lama kinaro bachalaijak borogni mokol kwchak kwchak. Aborogno nugui Rwngsati sundruma chajago bwkha kwlwijago, haiphano bwkhano tesa methebo omorogba borok c ble borogno ba tamo kirinani hinwi swkang lama himo. Gana thangrwrwk chwla khoroknwirog mokol nasikma tal juda nasigwi khorang khwlaima logi logino tei khorokbrwi chwla makra makra bolong bisingni ongkhorwi phailaio borogni nasikmung juda borogni tongmung juda Rwngsati chongwi manu omorog manwi hamya nwnglaijak(drug). Hai hinwi kirijagwi dakti borogno laiwi thangna naiphru chwla khoroksa romdi hinwi sawi teirog ursa khe Rwngsatino choproplaio, Rwngsati pal manjakya kwlaiwi thango, mare kamre khai bachana naibo bachawi manya Rwngsatini ri kichigwi thango, chirigwi kabu Rwngsati o darasong ano yakardi hinwi kabu aphru khoroksa chwla yachagwi sao yakarya tei nonobo nini mareni logiono rohornai, nini marekheba sak sak ayang masingo thangka tabuk nonokhe chwngno rohorsinai chini samung paima ulo. O kok khwnawi Rwngsati sakni thwi hor wngwi bachajago mokolo hor koksajago sakni phan tongmasing a chwlani okrebo lathi rio. Logi logino a chwla raisa kwlaiwi rima bai logini borokrog bono romlaio aphru sep manwi Rwngsatwi kharwi kami bwkhak chiriGwi thango burasa kamichangni yogwi.Kamio thangwi kamini borokrogno bebak kok khulogwi sao Rwngsati. Burasa kamichangni mwtai hamyarog sabo kamini borokrog aphrusi sawi manbaio.