DOPHANI SINIMUNG BIYANG – BIKASH DEBBARMA| KOKBWKHAL

0
243

DOPHANI SINIMUNG BIYANG?
By Bikash Debbarma (Khowai)

Kebo hwno Upajati, kebo ba hwno Tribal, keboba hwno Janajati, keboba hwno Songduk, keboba hwno Paharia, Bonbashi–kubuida chini sinimung hai wngkhana?Tripura hasteo haani bwsarogni soi sinimung biyang? O kok swngmungni soi phirokmung rwna thangkhe Tripurani laibuma o kisa habna nanglainai. Tripura wngkha Sa ra charchi brwi(184) Bugrarog bai naikoljak eba twidulwi phaijak kaisa haa. 1949 bisini 15th oct salmari o Tripura Bharat haa kotor bai gudalwi thangu. Oro sathai kwlaiyu Bharat haa kotor bai gudalya sani swkang Tripura haani bwsarogni soi sinimung tamo tongmani? Aphuru haani bwsarogni sinimung tongmani Tripuri eba Tiprasa. Aboni kaisa kotor phunukmari wngkha– 1931 bisio Bubagra Bir bikram kishor Manikya Debbarma Tripura haani bwsani bagwi “pancha Tripuri” bumung riwi kwbangma haa khowai, kailashahar, Kanchanpur, Sabroom akorogo reserve khulai kwlangmani. Pancha Tripuri o khobjagu Tripuri, Reang, Jamatia, Noatia, Halam. Oro sathai kwlaiyu kokborok sayani bisingo joto hoda Halam o khobjakbaio.

TRIPURA EBA TIPPERAH KOKTHAINI KOK YARUNG:- Tripura eba Tipperah kokthairog Kokborok kokthai Twipra ni simise ongkhoro. Twiprani Sanskritized form wngkha Tripura tei Tipra eba Tiprasani sanskritized Tripuri. Twiprani kokmang wngkha Twi ni pra, je thaio kainwi eba teibo kwbang twima phaiwi thansa wngkha. Tripuri eba Tiprasa, Dimasa, Bodosa Dophani achaimani kothomarog sawi mano kwchamkuk salrogo je dikholo Brahmaputra tei Ganga eba Padma twima thansa wngwikha o thai ni bumung nw tongmani Twipra. Brahmaputra ni kokborok bumung wngkha Twiyung, tei Ganga ni kokborok bumung wngkha Sangrongma. Brahmaputra twimano Dimasarog hino Di laubra, tei Bodorog hino Borlung buthur.

CHWNGNO TIPRASA HINWI RINGDI:- Bharat haa kotoro chwng nukgu hasteni mung aroni dophani mung baino pharjakgu. Phunukmari– Tamil bumung bai Tamilnadu, Bengali bumung bai Bengal, Naga bumung bai Nagaland teibo kubangma. Tripura haa obo Tripuri eba Tiprasa eba Tipra dophano rugwi no Tripura bumung pharjakgu. Bharat haakotor bai gudalma yakulo chwngno ST status rimani bagwi chini sinimung kwmawi ST se wngwi paibaikha. Phiyaba Naga, Mizo, Khasi, Garo borogbo ST no, haiphano borogni sinimari kwde kwmakha? Kwmaya. ST status manma eba rwjakma bagwi dophani sinimari kwmanai a kok Indian Constitution o swijak kwrwi. Tripura hasteo chwng nugo aro tongnai borokrog Tribal tei Bengali hinwi sinimari rijago. Tiprasa khe kwmawi c thangbaikha.
India ni kaisano Constitution, Tripurani juda Constitution kwrwi. India ni Constitution o Naga, Mizo, Garo ST wngwi borogni sinimari toni mankhe chwngkhe tamoni manya wngnai. Dophani sinimari constitutional right. Chini sinimari Upojati, ST, Janajati, Songduk, paharia akorog se wngsio. Abo wng maya.
Chwng sak baithango Tripuri eba Tiprasa hinwi sinimari rwkhe i haa ni saka chini manthai, oro ni laibuma, hukumu, mukumu, rwbai, heritage joto thai ono chini manthai saklaijagu. Abono kiriwi nw chukili khulai chwngno tabuk Janajati, Upojati, Tribal, Songduk, Paharia, Bonbashi akorog bumung pharwi chwngno kusu swnamwi tonikha. ST kaisa category se, ST status mankhe sinimari ma poknai abotwi kok Constitution o swijak kwrwi. Chwng sakbaithang Tripuri eba Tiprasa hinwi sinimari rwnani kirijago eba lachijago. Abo belai chaya kwlaio. Chwng muitu narukna nangnai je dophani sinimari kwrwi bini laibuma kwrwi, jeni laibuma kwrwi bini haa bo kwrwi. Phiyaba chini joto tongbaio haiphano chini tabuk mungsabo kwrwiswk wngjak.
Phaidi chini siri sitini kwchamkuk, kwbwi sinimarino teisa songsai tisalaiwanw, yak mochomwi khorang thansa khe nokha gurumriwi chirik khogwi chini sini mari rwlaiwano, Chwngno Tripuri eba Tiprasa hinwi ringdi.

Reference:-

  1. Call us Tripuri(Tipra) leaflet by YTA & TNSF
  2. Tipra dopha-kwmama,Rutukma,Songsama by Binoy Debbarma