KOKTHAIROG BAHAN KHALIYA – RUNIT DEBBARMA | KOKBOROK POEM

0
267

KOKTHAIROG BAHAN KHALIYA

Tamobo wngbaikhajani
Koklopni kokthairog bahan khaliya.
Bahan khaliya-
Bahan kwrwi buibo chajakya.

Khumrogno nugwi kokthai subu
Kokthai motomliya-
Motomliya! Buibo kholliya.

Chapti tabuk koklop bisingo
Ri thebwi khuturuk bisingo dao,
Koklop bising nok theo
Hugo muikwthwng thaikwthwng thumwi
Tabuk lengjak – uanajak.
Jeswk swio koklop aswkno ramo kokthai
O kokthairog bahan khaliya.

Bahan kharina bagwi
Ochaino ringkha diyari nairwkha.
Kebeng tongphun kebeng
Made mano sepeng?

Koklop bisingo sichamungrog
Tabuk thujak! Muktrwi lik lik
Bachanabo sak hilik!

Yakhwrai cholaijak
Koitibai hamti nogo thangna phaina
Bwkha koilaijak.
Koklop muchungphun
yakhwrai kwtal manjunani,
Muchungphun chaptibai baksa
Chabwi toninani rignai risa.

Koklopse tabuk koijak
Kokthairog bini kok khwnaya
Torya bahan khaliya,
Abonotwi uanajak kwpal yaksungjak.

_ Runit Debbarma