NWNG PHAYANW HWNWI | KOKBOROK KOKLOP by BIKASH DEBBARMA

0
700

NWNG PHAYANW HWNWI

Khamsajak khapangno methebwi
Muktwi kulaijak mokol kisino huwi
Hilikjak bwkhabai hama sotonwi
Mokol bwskango thinangni pohorno khakawi
Khatung khaja khe naising tongjao
Nwng phaiwnw hinwi.

Hoda gunangwi mokolni muktwi
Kami amchaio kwrwi nwngjaknai twi,
Ouk bukcha, biyalno kwpalo rujuwi
Phatisa maino phatitham chawi
Pherang kwrwi mwnakjak horo
Mokol bwskango thinangni pohorno khakawi
Khatung khaja khe naising tongjao
Nwng phaiwnw hinwi.

Hachwk gunangwi bemar kubuljak
Meleria, Dairia twlangu langma sasuwi
Bumani khurino bukcha khulai
Nukhwngo kulangu muktwi kochokriwi
Sabono sasinai birman ni kokno
Kebo khunanai kwrwi,
Haiphano mokol bwskango thinangni pohorno khakawi
Khatung khaja khe naising tongjao
Nwng phaiwnw hinwi.

Hopung bwthakyui thakliya watwi
Muktwrwi manya thuwi,
Nok gwnangwi choromjak watwi
Nukhwng kuplani bagwi
Swbano phunuknai kichik-kupla nokno
Kebo kaichomwi nainai kwrwi
Haiphano mokol bwskango thinangni pohorno khakawi
Khatung khaja khe naising tongjao
Nwng phaiwnw hinwi.

Maising mol ni push talo mosok bokorong kwlwi
Nogo chumjaknai nangkukma ri kwrwi,
Yongsa-kuksa, thampui warphaiu
Nok bising nokbwsa kwrwi
Haiphano kupalo yak swngwi
Mokol bwskango thinangni pohorno khakawi
Khatung khaja khe naising tongjao
Nwng phaiwnw hinwi.

_ Bikash Debbarma (2)