PUITONI YAKHWRAI – JAYATRI DEBBARMA | KOKBOROK KOTHOMA BWSA

0
169

PUITONI YAKHWRAI

_ Jayatri Debbarma

Siring siring belai siring siring! phiya pherang kokjak Samplini bwkhao, bo wansugwi manya Boyar o kok sawanw hinwi. cherai phangsini ni kwtwi halok bahai k mukphli kaisa bai pogwi mankha, salbrum muitu khwlaiya tongwi manya bahai k mukphli kaisa by pogwi mankha! bisikba kwrwngwi chasmai halokni duk mukphili kaisa baino dwrwksa chokha.
Cheraiphruni simino Sampli bai Boyar logi kaisa sak chalai. kami gana gana wngma bai salbrum malaio salbrum thwnglaio haikheno twrwk twrwk borok chasmai halogo kwlwgwi thanglaio, phiya Sampli bai Boyarni halok bwswk joratwi ayuk lokno sawi manya tamoni hinkhe Samplini nukhung aswk hamthaya jora jora biyalni bisingtwi ma laio, aroni bisingo c bupha kwrwi buma randi. Boyar wngkha khurumpui nukhungni borok bini maa pha tei bibisong Boyarni bagwi wansukmani juda. Boyarnobo khurumpui nukhungni borok bai no kaina muchungjaklaio tei se Sampli bai Boyarsong kicha micha jatibo soklaio, sandai kwrwngjakya phano halok kwrwngjak. salsa sampli bai boyarni kok bibi kicha ter manwi belai jolijakkha samplino haiphano bini jolimano kebono phunukliya siring siringkhe khao chobwi tonikha.
Samplini kami ganao school khungsa tongo. kwchang mungwi khoroksa phwrwngnai Boyarni bibini bayap. Kwchang bini mung c Kwchang phano bini mwkhangno naiwi kebo khale kwchanglak, mwkhang chepupui mokol kwchwng kwchwng kholai kolok wabak kuchuk. bono naithok eba naithokya hinwi sananito keboni sathaito kwrwi mwtai bono omohai k rohormanibo kaisale kaisa kok tongnai, amo kebo sawi manya jorani swkang. Boyarni bibi Kwchangno salbrumno Samplini kok sawi khwnario bini rwngmari bini tongwrwng kahamrogni kok, salsa kwchang Samplino nukha tei khwnamani swlai phano khaphurjakkha. haikhe salsa Samplini nogo kok rohoro phiya sampli o kokno yachagwi nahai manliya aphru Boyarni bini Samplino borogni nogo ringwi nahawi dadak sidak kok swngkha.
Boyarni bibi- chwla sitra hinwi de nwng Kwchang bai gosiya?
Sampli- ihi bai amtwiya.
Boyarni bibi- Hinkhe tei tamoni bagwisa? angle nono wansugwi c nini bagwi job khainai naiwi kaikhe kaiwi rina hinwi c naimani….
Sampli- Ang gosiwi manya bai.
Boyarni bibi- aharee tei tamo nai hino nwng? kubuni hamjakmarog de tong tamo?
Swrapsa siring siring tongwi sampli ‘imm’ hinwi sao. Boyarni bibi saimantwtwino saimaya hai khe sabo hinwi swngo phiya sampli mungsa sarakya wngwi tongo ulo tongwi manjakliya Boyarni bibi chini nokni Boyar de nini hamjakma borok hinwi swngwi riphru Sampli lachima bai kirima bai gosiwi rikha, aphru nokni bebak borokno khuthumlaijak Boyarbo ganaono. Nokni borokrog Boyarni o kok kubuida hinwi swngphru logi logino Boyar sao- Ang kobor de? ang tamoni bono hamjaknai! o kok khwnawi Samplini tei mungsa kok mungsa khorang khwnajakliya bwkhao simi pherang kokjago.
Mokol kupulung mwktwi khaiwi nogo kiphilwi phaiwi Sampli hopung kobong misiwi kabu tei ha sakao tongliya hinwi wansugo, phiya wansukmatwi khakamatwi wngwi manya, tumung wansukmatwi wngwi mankhe bo omo hai khe kapnabo nanglakkhamo. sak sakno bo kok bai methebnani chongwi manjakya phano Sampli bwswkang langmani haduk himna chaitogo. salsa Sampli muya phaina bolongo thango aphru Boyar bono rwktharwi thango tei Nakar sanu Sampli nakarwi manliya bono, Boyar Samplino sao-
Boyar- Sampli, nwng ano nakarsidi! maa babuni swkango ang nini bai ani halokno gosiwi manliya phatsa khe. gosina phan manya wngwi thangka.
Sampli- Aphru gosinani phan nwng manliya, tabuk aphruni lachimungno soinani phan anibo kwrwikha, nini langmani ang chalwi thangsinai. Nini bagwi ani puitoni yakhrai aphruno chowi thangka!
Boyar- Sampli nwng ano omo hai lama kwcharo ta khibdi. himdi tinino ang nono ani nogo twlang thangsinai…
Sampli- wngkha wngkha tei sana nangliya! twi kwcharo saichung khibjaknai ang c nwngya! rwngtwi rwngyatwikhe kwlwk kuphungkhe twini banchi phaiwi mankha phiya tabuk horo khikwlaijakkhe tei horni le kwthang bachai phai manglak! ano ani lama rohorsidi.
O kok khwnama ulo Boyar mungsa kok sawi manjakliya Samplibo bono kok sana sep riliya dodoro phaiwi paikha, khuk bai si sawi kabu phano bwkhao twi juwar kajak! salsa kwchang Samplini nogo phaio, Sampli siring siring achugwi tongo, kwchang sawi manya sampli bai Boyarni kokno. haiphano kok rohormani kiphilwi manya wngwi kwchang Sampli bai malainani nogo phaio…
Kwchang- yongbrwile nogo kwrwi de?
Sampli- kwrwi.
Kwchang- Boro thang?
Sampli- Toisongni nogo. Tamo samung ba? akon achukdi.
Kwchang- Samung hinkhe kicha nwngbaisi, sawi manya ang omo hai khe nini nogo phaimani chama de chaya de wngkha tobo khe ang phaiya tongwi manliya ma phaika…
Sampli- tamo bwtwi samung ba?
Kwchang- nini bagwi ang kok rohormani tongo nwng ba khwde khwnakha sawi manya tamo khe ang mungsa kiphilmung manyakhu aboni bagwi khwnana muchungsugwino ma phaikha…. ang sio, ang bui hai naithokya phiya ani hamjakmani ani bwkhani si phaio o hamjakmungno ang bui bai sursana thangya. sawi manya nini bwkhao kebo de tong phiya jephruni simi nini kok khwnao nono nugo aphruni simino nwngle ani bwkhao. tabuk ang nini kok c khwnana naio.
Sampli- Maabai salaidi.
Boyar- Nini kok khwnama ulo c ang sasinai. ang nini kok si khwnana phaio.
Sampli- Langma kolok kwnwi tongwi thana bagwi hamjakma, puito tei khoroksa te khoroksano je jora phano logi rinani phan tongna nango, omo nwng naragwi de mano?
Kwchang- nono hamjagwi c tini nono rwktharwi maphaio tei ang kok rio kwthang tongsak nini puito naragwi nini logiono tongnai.
O kok khwnawi Sampli mwkhang tisawi Kwchangno nasigo tei siring siring khe mokol bai mokol kok salaio, sabo sa nono nwng naithokya hinwi? nini naithok boro huijagwi tong nwng sawi c manya! nwng simi ya amo bebak borokno sawi manya nini naithokmung boro? ani mokol bai nasigwi naikhe sawi mananw nini naithokmung boro tei sawi mananw naithokni bisingo sitra saboni aro huijak tong!
Talsani bisingono Kwchang Samplino kaijagwi bini kamio twlang thangka. kami aswkkhe hachal beraina thangwibo waikwlai kiphil manya. Kwchangni hamjakmung, puito tei logi manwi Sampli twrwk twrwk bini swkangni kok pokna chengo. phiya Boyarni mungsa chaya samung salbrum bono tekto rio. aphru buma bupha tei bibini swkango phan sotonwi ih ang Samplino hamjago hinwi sakhe tamo wngkhamo o kokni paithak kebo sawi manya. Boyar sawi mankha bibini jarwi kwchang bai Sampli malaimani kok aboni bagwi boyar bibi bai kok saliya hinwi swmai tango.