SAKSUBIA – ASHIM MURASING | KOKBOROK KOKLOPYUNG

0
140

SAKSUBIA

Khaksa
(Chokdri songsakha)

Tuiwandal kamio salsa
Chokdri khoroksa ni khorokba
Jani ja aari khak~kha |
Chintahoron para ni ongui
Pohori mungui khoroksa
Chokdri kutal chakha ||
Hohom dodom khe,
Udila khaphang khe,
Nohkhung ni borok lamsok~kha |
Aa mui chakhwui tei
Awan buthai bai khe,
Lukurok paanda chalaikha ||
O jorao,
Khungsa para ni chokdri chamani
Haa ni raja chamasuk |
Samung rok ni bethek rok bo
khoroksa chokdri ni thani
Kwpalo hor chungmasuk ||

Khaknwi
(nohkhungni borokrok koktwma mankha)

_ salsa phung aisri siri
Musuk aataal naaro kai; Pohori
Thangkha melaghar hatio,
Sajwla kuchar tei ganani
Digra sena thangmani
Musuk thui jak nugui yo |
Dopra hampra phaisaphai~kha
Khuk bai peplakha O aama, o aama Chinile musuk thui thangkha | O kok khunaui pohori ni bihik sakha
Twma! O mwtai nwrok twma khlaikha,
Swbani surai~mung nangkha?
Kwpalo de yak swngnai !
Khangaro de yak swngnai !
Pohorini bihik Jogpati ,wanajakkha |
Kakra kokro khe muktwi
Pohori ni achaisong bukhuknwi
O jorao phai sokphaikha ll

Khaktham
( Lukuthum )

Jaduni khorang bai rwchabui
Pohori ni achaisong bukhuknwi
Khaklap no bukhrwpkha ||
Pohori ni yaktui
Musuk thuimani koktwma
Para gwnangui kok pirjakkha ll
Yang ayang bebak jagani
Ha~mung siniya joto para ni
Borok rok phaibaikha ||
Koktwma no manui
Pohori ni nokhola ow
Luku kuthumlaikha ||
Twma kok?
Twma khe ongkha?
Joto wanajaklaikha ||
Baksa sao saksubia
Baksa sao kwpal hamya
Luku poderepod kok sana chengkha ||

Khabrwi
(Pohori phai sokphaikha)

Luku poderepod
Haike kok salai
Sal chugui sairik ongkha ||
Melagharo hatio
Muikthung pai bai
O jora, pohori phai sokphaikha ||
Nokhola kasa wui,
Pohori yakung ro drop,
Boni, nokhlao kukuthumjak nuguikha ||
Wanajagui pohori swngkha-
-twma ongkha?twma ongkha ?
Musuk thuimani kokno khoroksa sakha ||
Tabuk twma khwlainai?
Twma khe chahshinai?
Swba shi tongthar ni raida?
Jogpati bini gusai no muito mankha,
Haike phai sokphaikha bura gusai,
Tai O kokthai sakha–||

Khakba
(Kwcham tongthar raida)

No-go makasaya
No-go mathuya
Bisi~chichar kayasak ||
Khunai siliui makhibinai
Khunai siliui matoninai
Bisi~chichar kayasak ||
Musuk buduk makannai
Thuinai musuk ni khonti bai
ma~berai nai musuk hai ||
Nokbui nokbui bikha masannai
Bihik bwsa butui bai hakchalo matongnai
Je mannai abo no songui machanai ||
Patisori ow thangui
Tui kwthar no nugui
Harichan maprovuno nakarmung masannai ||
Tui kwthar bai tukuwui
Sakni kwkhar khibiui
Haike bini deramung shujaknai ||

Khakdok
(Kwtal raida)

O kokthai khunawui
Pohori ni bihik tei bukhuknwi,
Wanajaklaikha ||
O lama no karui
Juda lama phunukdi hinui,
Gusai no koihorkha ||
Bwrok ni koihormani bai
Wansuk wansukjak para ni gusai
Tai O kokthai sakha —
Samani joto makhwlainai
Fiya bisi chichar ni jagao,
sal~chichar ongnai .
Obo no ongnai kwtal raida ||
malmata bwthar mani,
borok tanthar mani,
Abo belai tongsitra ni samung ||
Je borok khahya nangjaknai
Je borok hamjakma pir nai
Ah borok ni no swargo~ow nohkhung ||

_ Ashim Murasing (Twiuandal)