SWRAIMUNG (KOKBOROK ARTICLE) | SANGIT DEBBARMA | PART 2

0
250

Ano khibiwi buino kha rikhai
Wansuk kul manya wngthun.
Horni chengkharu nini hor wngthun
Bwthar kul manya wngthun.

Oro kok wngkha hamjaklai tongmani bero khapilaiya wngwi phano chwla bwrwino yakarna naikhai eba khoroksabai hamjaklai tongtwtwino tei khoroksabai hamjago eba khoroknabai tongwi-chawi yakarna phasing thangkhai bwrwi phano chwla phano je thokinaino swraio hamwi matatongthun hinwi. Kok wngkha bono nayawi tei khoroksano nakhai belaino wansukma kuthugo kwlwkthun, kwpal birman manthun hinmani kokse eba bwsai phano bihk phano hamya manwi wansukmng tongna nangthun abohai hinwi swraio. Tei bini langmani birman tathaklangthun hinwi sao, chengkharo horo hinkhai chwngo bo chwngwino tongo thwiya, abohaino chengkharono hor hinwi bwtharwi ma tongthun hinwi sao.

Chana cha kwchang tamachalangdi
Siping maichwlam chatwi wngdi.

Oro kok wngkha tongkwchang chakwchang ta matong langthun. Abohai birman-bikhatao kwlaiwi mang tongna nangthun hinwi swraio. Siping bokol hinkhai belai chikon chikon bono mai haikhai chawi ok supung manya. Borokrok kubuni jesa chamungno phano chadi mai chamatwi wngya. Abono oro swrainai swraijaknai borokno tongkwchang-chakwchang maya tongya wngthun hinwi kha nangjagwi swraio.

Buini mwnwimung wngthun
Kham khorang ta makhwnathun.

Tipra hodao kaisa raida tongo kailai phuru kham nawi kailai panda khwlaimani. Phiya baksa baksa tongo kaijakya-borjakya sanino mung nangwi bwsa khebwi matongmani. Abohai tongmungrok hodao belai seleng mokolbai nasikjago. Tei hodani borokrok omohai tongmung tongnai borokrokno twiwi ukolok kok tai tai salaio tei mwnwilaio. Kok hinkhai hodani mokol sitra, kosok, kusum, seleng mokolbai nasikjago. Kok hinkhai kaijaksanino omohai tongmung wngkhai bo tei makaijakya wngo. Swrainai aboni bagwino bo naslema borokno omohaikhe kha nangwi swraio kubui kubuino bini swraima nangthun hinwi.

Thongar kochogwi muktwi yorlangbo
Kha chongma tamanlangdi.

O swraimung kokthaio dak dakno sijagwi tongo hamjakma borokno manya wngdi hinwi swraimani. Chwng chajakma borok eba khani borokno manya hinkhai belaino kha yogo tei kha khamo. Thuwi-chawi muktrwi maya wngo, twikhereng yortwi mokolni muktwi yoro bono manna muchungwi. Khao chongwi tongma borokno manya hinkhai bwwkse kha subuksai phai abo sanani kokya. Aboni bagwino swrainai a borokno manya wngmatwino bono kha yok rinai borokno bini chongwi tongma borokno tamanthun hinwi swraio.

Ano khibiwi buibai nwng wngkhai
Asa tapholi langthun.
Khurini hik hinwi kwbakkhai
Kwbak mangkereng wngthun.

Kok hinkhai khoroksa bai hamjagwi tongwi tei khoroksa bai wngkhai bini bebak hikno twiwi asai tongmarok, kha chongwi kothoma wawi tongmarok bebakno pholiya wngthun eba manmari manya wngthun hayakheba nini wansugwi tongma, asawi tongmarok mukthang wngya wngthun hinwi swraio. Abo khani borok khano sol khaiwi thokiwi thangjakma bagwi kha khamjagwi, kha dukhu wngjagwi swraio. Teibo swraio khapangni hikno hamjakmaniswk kebo kubuni borokno hamjakya. Jephuru khachukni bihikbai hamjakma yapharlai tongnani eba hamjakma bagwinani jora bihikno ta manthun hinwi swraio eba hikni mang kwthwi matangthun hinwi.

Kokthumnai – Sangit Debbarma (M.A. Kokborok)

Read Part 1 Here 👉 SWRAIMUNG (PART 1)