SWRAIMUNG (KOKBOROK ARTICLE) | SANGIT DEBBARMA | PART 1

0
347

SWRAIMUNG

Lukurok khoroksa tei khoroksano tamongwi kul tei swrai abo amjogwi naithai kwlaio. Borok khani pas rihorna bagwino swraio o kok bebakno sio. Jolimung, kena nangmung, naslemung, bwkha baimung, bwkha tongo yak chukya eba buibai satokjagwi hanang pinang khwlaiwi tongphano bukhuk phiyokna phan sokya abotwirokni bagwino lukurok khoroksa tei khoroksano swraiwi tongo. Baksaba buibai dagarjagwibo jora jorao bukhuktwi kok hamya tikhwlaio. Baksa jora jorao khoroksaswkno hamjakma bagwibo khuk hamya tikhwlai kok sao. Chini tipra hodao eba borok bosongo abotwi kwbangma kulmung, swraimung eba kok hamya salaimung chwng khunju kwrai kwrai khwnawi phaikha.

Swraimungni ukologo kok thaibrwi tongo- (i) kena nanglaimung, (ii) swkangni simi kochogwi phaimani hukumuno yakungbai ermung, (iii) sakbaithangni mungsaswk hamya wngmung, (iv) thamchi kamung eba jolimung. O mungbrwi eba dalbrwino twiwno swraio. Kulmung eba swraimung swrapsani bagwise, phiyaba swraimung nangwi mano sal kolokni bagwi. Mahabharat ni musol porbo o risini swraimung bai bebak jodu bosong komorwi thangmani kok tongo. Abotwirokni bagwino lukurokni khao kaisa puitu tongo swraimung nangwi mano eba nango hinwi. Khoroksaswk kha nangjaksugwi swraikhai abo kukubuino kha swrwk charinai kokno. Swraimungni kokthairok khwnawi kha kirisoro soro wngwi sakni buikhumu bachao o kokle soino.

4.1.Swraimung kokthai:
Swraimungno kok kisabai sana thangkhai sawi manya. Swraimungo naslema, khakhamma, kha yokma, kena wngma bebakno khopjagwi tongo.Tolao chwng tabuk swraimung kokthairokno cherwi nailayanw-

Bwsa yak kumun chana hinmani
Gati warochok bangthun.
Nukhung sajwla yago daborok
Hapung tankhwlai tongdi.
Kobong tanlalai thulai tongmani
Kwcharo pherang kokthun.

O swraimungni kokmangno saiman hinkhai puila o swrainai tangwi swraikhwna abonose puila saimanthai kwlaio. Tamoni hinkhai swrainai borokbo hainole swraiyana binibo khao mungsaswk wngjakma eba nangjakmale tongnaino. Bo naslewi phano swraiwi mano, kha nangjagwi phano swraiwi mano, kena nangwi phano swraiwi mano. Phiyaba o swraimung kokthai khwnawi sak twi karwi phaio. Kok wngkha oro jeskhai phano o borokni hamya wngthun hinmanise bwsani kamai eba bwsani yak kumun chanani joto ma-phano khakai tongo. Phiyaba o swrainai bono bwsani yak kumun tamachathun hinwi swraio. Nokni sajwla hinkhai ma-phano kamai charinai samungo yak buloknai eba chubanai, tumung bwsla bumuk perya eba khasiya hinkhai buma-bupha birman mano. Yago daborok tongphano daborok bo thaio samung nang abo siya hapung tankhwlai tongkhai tei samung chaliya. Hapung kuchukno daborok bai tanbo tanbo ai kasaya. Oro kokbokhori wngkha bwsa siya butuwa talsokya achaithun hinmani kokse. Sana thangkhai jesakhai phano hayao kwlaithun hinmanise. Tei kwchang kwchang nukhung khalai chalai-nwnglai tongmani akojo kotoro kwlaithun hinwibo swraio.

Tokha birsukya huk khwlaiphano
Tono mochomsa manthun.
Tono mochomsa manmani bero
Sukkhai mai rungkhu wngthun.

O kokno cherwi naikhai saimano agini jorao tipra bosongo huk khwlai chalaima raida tongo. Hugo mai kaikhai tokharok kwbangma toksa-toktwirok mai thaima jorao mai chana phaio. A jorao baksa hugo kaham khai naikolwi tongkhai tokharok phairakya tei kubuni tokrokbo kwlai phaiya hinkhai mai kaham wngo. Phiyaba oro swrainai sao abohai tokha kwlaiya phano mai kwbang ta manthu bukubuk mang wngthun hinwi tei mai mochomsano manthun hinwi. Aswkbai swrainini bwkhani pas paiya bo teibo sao a kisisa mai manmani bero phanose bono sukkhai mai rungkhu mang wngwi thangthun hinwi swraio. Sana thangkhai o kokno sana kwlaio swrainai jetwibo a borokni kaham naiya jesakhai phano hamya wngsukthun abono naio.

Sikamuk kwpal manthun.

Oro sikamuk kwpal manthun hinmani kokno wngkha, sikamung kaisa twio tongnai manwi bono borokrok romwi chao. Tei chanani swkang bono satung kutungo phwranjago ha kwbana bagwi, aboni ulose songwi chao. Kok wngkha sikamukno chana hinkhai kusubwi chana nango. Sikamuk borokrokbai kusubwi chajakma haino bobo buibai kusupjakthun tei birman tekto manthun satungo sikamuk phwranjaktwi. Swrainai khabai khukbai obono naio.

Simanok kwrwi wngthun.

Simanok wngkha thwimani yagulo simalwngo tangwi kabujakmani nok. Tipra bosongo kaisa puitu khaijakma tongo thwimani yagulo ayang masingo sogwi khai nok-huk manna bagwi o simanok ma tango. Simanok tangjakya hinkhai boa yang masingobo nok-huk kwrwi birman nangwi matongwio hinwi sajagwi tongo. Kok hinkhai thwimani thai thiti kwrwi hinkhai simanok tangjakya wngo eba kebobai jai khwlaijakya boroknino simanok tangjakya wngo hayakheba thwiphano kwthwi mang manya hinkhai sobo sokjakya wngo. Swrainai abono a borokni hamya wngsukthun hinwi swraio.

Laiphang kwbagwi thwithun.

Tipra dophani luku raidao kebo kaijakyasani thwikhai bono laiphang kwbakri sogo. Kok wngkha kaijakya-borjakyawino mathwithun hinwi swraimanise. Tamoniba ha sakao borok wngwi achaiwi phaikhe bo makaijaknai. Makaijakyawi thwikha hinkhai lukurok salaio o thwinai belaino kwpal hamyani borok hinwi. Oro kok wngkha swrainai bono eba a borokno ma kaijakyawino thwilangthun hinwi samanise.

Muya sikla kwchar baichoktwi
Sikla baichoklangthun.

O kokni kokbokholo wngkha hamjagwi tongmani manya wngwi swraimani. Muya achaiwi sikla wngkhai baksa baksa nobar nangwi eba bwlaini hilikma bai kwchartwi baichogo eba endul phano kwcharo chamani bagwi baichogwi thango. Borokrokbo abohaino sikla sogwi chwnasai phaima joraono kaijakna nango eba makaijago. Phiyaba baksa baksa borokrok jora baikhwlaiwi thangphano makaijakya wngo jorani phero kwlaiwi. Swrainai obono naio bo matakaijakthun kaijakna jora baikhwlai thangthun hinwi.

Kokthumnai – Sangit Debbarma (M.A. Kokborok)

Read PART 2 Here 👉 SWRAIMUNG (PART 2)