SWRAIMUNG – SANGIT DEBBARMA | PART 4

0
127

Mairang tanlalai kwnwi chaphuru
Mairango nobwraisa khithun

Oro kok wngkha hik-sai changdodo khaiwi mai chalai tongphuru mairango nobwraisa bikhi eba jeba mungsa hamya eba selengjaknai manwi kwlaikha hinkhai borokrog tei mai chawi manya. Kok hinkhe obosi nukhungo hik-sai kwchang kwchang tonglai tongmani phano borogni nukhungo chakhwrai-nwngkhwrai kwrwi wngthun hwnwi swraimani si. Abohai swraimungrog hamjagwi tongwi manya wngmani bagwi eba hamjakma borokbai yakar kwlangjagwi swraimani wngkha o swraimung.

Ani barini phanthok khokhwlai
Yasi biyadi chathu

Obo wngkha mungsaswk manwi khokjagwi swraimani. Oro yasi biyadi wngthun hinmani wngkha yasi sogwi thangthun je manwi khoknaini hwnwi swraijago.

Ani satwino hamya hinmani

Khukoi sajwla manthun

O kok wngkha bwrwi sak deriyano swraimani. Bwrwi sak deriyarog jora jorao buino nasik manya wngo tei a jorao cherairog hesebe koisene manwi khwnwirog tangwi chirik morok wngkhe teibo jolijagwi khuk hamya twiwi kuthuk rohoro, abohai kutuk rohorjaknaini bumasong kha nangwi swraimani wngkha o swraimung.

Buini chekabo hor sunu mani
Baithang khampurui thwithun

Buini hamya chaya naimani, buino sejamani, buino naselenai, buini bagwi hamya kok samani abo baithangni sagono kwlaithun hwnwi swrai mani wngkha o swraimung.

Khio kwbao wngwi thwithun
Yakung yak manya tonggaro kwlaiwi ma tongthun
Khini kundulo kwlaithun
Mai ma chaya ok buwi ma thwithun
Bongosoni tongthai tongphano bini tongthai ta tongthun.

Oro kok hinkhe sak hamya khio kwbao wngi thwithun tei yakung yak maya wngwi kutul manya kwpal birman manwi tongthun hinmani si. Swrainai aswkbai phanose bini bwkhani pas paijakya bo swraima borokno teibo nisura wngwi khi lwngo kwlaithun hwnwi swraio, abono karwibo mai ok khuisini ok khuiwibo ma chaya eba chanani kwrwi wngwi ok buwino ma thwilangthun hwnwi swraio. Swrainai teibo swraio hamyani sai hamyakuk wngthun hwnwi, bongosoni tongthai nok tongphanose bini tongthai nok kwrwi wngthun hwnwi swraio. Oro sana kwlaio swrainai bo swraima borokno kha khu nangwi aswk khai swraio swraijaknai thaksukjak hamyao kwlaithun hwnwi.

Gati bomphwrai mwsa bwslai
Twio basuwi swraio
Salbo thangrwrwk watwi warwrwk
Khao kok sarwk sarwk
Tangma ojama nukhungni raja
Nono kok sarwk sarwk
Musuma bangthun khachikma bangthun
Nono jaloknai bangthun.

O swraimungbo kaisa kha khu nangwi swraimani.Oro chwng nugo twio bachawi swrai mani, Tipra bosongni bisingo agini simino chwng kaisa khwnai pohaimani tongo twio bachawi swraikhai a swraimung nangya thangya hwnwi. Aboni abgwino chwng o swraimung kok bwtango rwbaini bisingtwi luku puito ni kaisa mangpili nugo. Swrainai oro sao musuma khachikma bangwi buibai jalokjagwi mang tongthun eba buibai tekto rijagwi mang tongthun hwnwi swraio.

Sangit Debbarma (M.A. Kokborok)