TABUKNI HALOK – AIPOHOR DEBBARMA #KOKBOROKPOEM

0
213

TABUKNI HALOK


Twrwk twrwk khe kochogwi tongo,
Bebak halok ni paithak phasingo.
Ayang naro le twma wnglang no,
Paina jorao thapla da chano?

Buphang bocholongo hulok chirigo,
Khorang yachagwi kebo da phaino!
Bedek ni bedek cholaiui naio,
Kebono manliya chirikhogwi boh.

Twini takhumsa pungma thakliya,
Twi yoksin yogwi ruthuk manliya.
Boro bo thangkha swbabo nakha,
Bothob suprujak mungsa nukliya.

Tosor bisingni larima naithok,
Nono nukha khai aswk kha tongthok.
Bwkrang phehelwi sakno manya khe,
Swrabsa o no langmano ma pok.

Kherengbar bubar aswk motoma,
Hapung thaisini twibuk buksini bahai sarwma.
Muwani phwnangwi motom suriui,
Sakni bahai bo kagwi ma thangma.

Tongmung bo chini ahai no thangkha,
Saksak ni no majra bo wngkha.
Gosi manya kho mwktrwi paiya kho,
Baithango kwrwi halok kwmakha.

_ Aipohor Debbarma