TOKTHU – PRACHAN DEBBARMA | KOKBOROK POEM

0
133

TOKTHU

Khwnatok, mwrwi mwrwi tokthuni khorang
Lengma pogwi manphiro jaduni khapang.
Bithi charijakma haikhe thapsa ungkha
Bwkha ani tei tongthokmao kwmakha.
O pungmung bai bolong walung sikla chajak,
Kiphilwi kiphilwi phaio yamrok yachak.
Boro huigagwi pungwi tong khani tokthu
Laijak kokno kicha kicha manri muitu.

Hachwk phaisingni bwlai kwlaijak khwrwi
Bedek saharjak tei bwsago phan kwrwi
Aroda baui pung hani nilar swbaina,
Eba walaijak hik-sai no mwnwi rina,
Eba dengdoljak wasurni wasok buchuk
Baui kwmajak khani borokno naithuk,
Bumoba kubui ungkhwna saimanliya
Tamokhe bini kokthaino Ang bujiya.

Phiya o pungmung hamang gothokma belai
Logi khamni khorang kwrwino kwpwlai.
Swlwk pungmung phiya bwswkse kwtwi
Khani borokno khakaui yoro mwktwi,
Kha khaio pungnairogni bisingo Rani
Bini bwskang mungsa dam tongwlak ani.
Tomung tini kebono naitugwi pungkhe
Ang logi rinai tongu logisong haikhe.

_ Prachan Debbarma

Kokbwkha: Salsa lengwi nogo achuk tongma jorao tokthuni khorang kwtwibai pungmani khwnai kha belai tongthokha. Agini laithangjak kokrogno muitu manri boroba baui pungwi tong nuhor hoya, khwrwi buphang da eba wasur buchukgo da baui pung aswk swlwkma chaoi. Boba khani borokno da naitugwi pung, dukhu nangjagwi da pung angba bini kokthai bujiya bai mungsa siliya. Bini pungmung aswk khwnatok Angle bini ganao bachana chukgwlak, phiya logi rinale angbo raji tongu.